حكــــم الهـــــــوى

[خلفان الوشاحي]

ياونّـة اللي بات قلبه خفوقــــــــــــي
ونّة غريمٍ صار حظّـــه شحوحـــــي

وياحرّةٍ فاليـــــوف شبّت حروقـــــي
من حّرها بركــان شوقي يفوحـــــي

خبّت ع مضمار الهواجيس نوقــــي
وظلت بميدان الضمــاير سروحـــي

وظاقت دروبــي بين كل الطروقــــي
ولا لي من المسعاف يبري جروحي

آنا المتيّــــم زاد فالحــــب شوقـــــي
وبـــي علّةٍ ماضنّها بالصحوحـــــــي

ياصاحبـــي بالرّوف خذني شفوقـــي
شربكْتني يازيـــــن وآخر تشوحــــي

شطّيت بـــي ياخشف ريم الطلوقــــي
يامــــن رعا مابين ريم السروحــــي

حبّك سرا مابين مجرى العروقـــــــي
وداخل عروش القلب شيّد صروحـــي

وعندي مقامــك غير بين الخلوقـــــي
فــــدواك نفسي وكل حالي وروحــــي

يامــــن سرقت القلب مني سروقـــــي
ردّه عســى ينزاح خافي جموحـــــــي

أرميتنــــــــي وآنا المحب الصدوقـــــي
وخلّيت دمع العيــــن يهمل نضوحـــــي

وبحرك طماني بين موي الغروقـــــــي
ومركب غـــرام الشوق آزم يشوحــــي

وين الوعـــــــد لي كان منّك وثوقــــــي
وعهدك يلـــي به كنت أبني طموحــــــي

أكتــــــــم ولكن كم بصْبـــــر لعوقـــــــي
لابـــــــد م المكتــــــوم سره يبوحـــــــي

عــــزّاه من جرحٍ سطا بــ امْعلوقـــــــي
منّه شكيت الهم والعـــــــي وانوحــــــي

حكـــــم الهوى ظلّام مابه حقوقـــــــــــي
ولاينصف العشّــــــاق عند الجنوحــــــي

تمّت وسقــــت العذْر سوق السبوقـــــــي
واختم مقال الشعْر وابغي السموحــــــي