صبـــــر الآمــــــــال

[يقظــان الشهيمي]

صبـــــر الآمــــــــال

تطيح دمــوع من عيني ولكن الأمل فــــوّاق
يفوق الصبر حــالاتي ولا ضجّت مساحــــاته

سواد أيام مرت لي وحزني دامسٍ طــــوّاق
أحـــــــاول ألبس طيوفه وتلبسني عبايــــاته

خريف العمر في صدري يقلبني على الأشواق
مــــدينه حبنا ذاقت ألــــم قاسي عذابــــاته

كفوف الحظ طـرّاقه وتسبقها ذنوب فــــراق
وبخت أيامنا ساقت خطاها فــــ إتجاهــــاته

سجين الحلم والماضي يراقب لوعته حـــرّاق
فقيد الحب مـــ عادت تسولف له حكايــــاته

تعبت الأمس يحكيني يأملني بشمس إشراق
وتعبت اليــــوم أحكي له يأملني ملاقــــاته

عرين العشق ما عاد الهوى في خافقه صفّاق
ولا عــــادت مبــاسمها تغني لي محاكــــاته

تعبت أسامح فراقه وأقول أنه بعد يشتــــاق
بيرجع لــي على دمعٍ يسولف لي معانــــاته

وأقول أنه بعد يرجع يقبلــــني بكثر عنــــاق
وترجع لي مواعيده وتكشف لي حجابــــاته

غريبه أحلامنا صارت مطاياها حزن سبـّــاق
تعــــرّج في فضاء طيفه وتقتلها جراحــــاته

طــــوابير الألم تجري يغلفها ضحك ســـرّاق
وآهــــات الوفا تبكي ذنوب فراق مأســــاته

وأنا من كثره همومي توشحني ألم خنّــــاق
ولا عــــاد الفرح يسكن ولو مره مكانــــاته

الآ ليت الهوى ذنبي قطعتك يـــا قدم هالساق
ولا مريت من دربك ولا قصــدّت حاجــــاته

بسـافر بس توعدني أبيك تــــراجع الأوراق
وأبيك العمر لــــو مره تفكر في قرائــــاته

أنا إنسان في قلبي مدينه تحفظ العشــــاق
ودستور الـــوفا عندي رحيقٍ لــه مذاقــــاته

الآ يــــا رب صبّرني وقدرني على الفــــراق
وصبّرني على عشقٍ جنيته من حسابـــــاته


يقظـــان الشهيمي