العنود الريم

[بن ساعد الجنيبي]

يا هبوب الكوس باحملج سلام
صوب دار الخل مملوح الجبين


معطر(ن) باحلى ورود(ن) من خزام
يوصل الغالي لعنده ويستكين


ويا العرب الايواد بوصف بالكلام
بو عويد البان والخد الحسين


له عيون(ن) رميهن مثل السهام
والخدود مورده مشمش وتين


حاملن ما بينهن حد الحسام
وثغره الحالي حوى لولو دفين


ابجماله نافس البدر التمام
وصرت انا من زود حسنه له سجين


ان تبادالي كبرق(ن) في ظلام
و ضح نوره من قهوب الحاجبين


رفعت كفي داعي الفرد السلام
يحفظه لي من عيون الحاسدين


ان حضر له هيبة ملوك(ن) عظام
وان لفظ بالقول شد الحاضرين


وابشموخه معتلي فوق الغمام
والتواضع شيمته في كل حين


يالعنود الريم يا نسل الكرام
أرفقي بقلب(ن) معذب من سنين


من كثر ونات شوقه والهيام
يصبح ويمسي وحاله في حنين


والختم صلوا عدد طش الرثام
ع النبي المصطفى الهادي الامين