اهداء الى ... جمعه المخمري

[يحيى الرواحي]

تغيب الناس والدنيا ويبقى ذا الكرم والجود
رحم الله زمان كان فيه إن الرجال أفعال

قساوة تكسر قلوبن تعيش بعالمن نمرود
وراح الطيب برجاله وبقت في الدنيا بعض رجال

أشاكيلك ودمعي هل ع خدي يحفر الأخدود
متعلق بحبل الصبر بزمان تقل به الأمال

زمانن راح بأحلامه ويقضي بالفرح يحمود
وتهنا بعالمن ثاني عمل ومتعدد الأشكال

يعمي لا تؤاخذني أحس بخاطري مؤود
أذا صار الأخو يجهل معنى كلمة كيف الحال

أنا لي خاطرن ابكي وابيح في غلاك سدود
صوبك طارت أشعاري وعندي جاري الإرسال

^^^
جمعه بن سعيد المخمري


---------------------------------
هلا وسهلا وحيابك عدد ما حن صوت رعود
وما هل المطر يسكب على روس الحزون وسال

وعدد ما غرد القمري ويسجع في طروف العود
يذكرنا بزمن ماضي زمانن به قروم رجال

أسمعك تشتكي جمعه ودمعك سال فوق خدود
يهون الأمر يا جمعه وخذلك م الصبر حتمال

ولا تجلس تعاتب كل شخصن ف الزمن وتعود
ولو سويت هذا الأمر ما تلقى ابد رجال

ولكن خذلك الحاصل وخلي الصعب والمفقود
تعيش في دنيتك مرتاح متهني ومريح البال

وأنا مثلك ألاقي من صروف الدهر مر وزود
ولكن الصبر أولى وربك يفرج الأحوال

سلامي لك وأخوانك عسى ايامكم بسعود
كذاك الوالد الغالي ومن عندك حضر نزال

ومنك اعتذر جمعه إذا بشعري بدا منقود
لاني ما أنا بشاعر ولا لي بالشعر مدخال

أحب الشعر واهذيبه سجية في الليالي السود
واتابع بادعين الشعر وأهوى مضرب الأمثال

صلاة الله نهديها نبينا في البشر موجود
عدد ما لاح براقن يساني والمطر همال

كذاك الآل والاصحاب ما تسمع حنين رعود
وما هل المطر يسكب على روس الحزون وسال

حمود بن علي الرواحي