الجذع والفاس!!!

[سعيد المشرفي]

صب الهجر في كاس واعطيني الكاس
بشرب ولا هالقلب يعلن خضوعه
قدام عينك شامخ ورافع الراس
والعزم فيني ما لوى حدّ كوعه
وفي وحدتي أسكب همومي فقرطاس
أكتب وجفني غارقً في دموعه
تمطر عيوني والمعاليق يبّاس
واغرس (طيوف) ويثمر الغرس لوعه
ظامي وصال وخابرك منبع احساس
وش فايدة نبعً ظوامي زروعه!!!
أغليك لكن الأمل يخنقه ياس
ونجم الجفا بيّن فعينك سطوعه
لاما كرهتك وارفض الهام ينداس
آدوس وجدي لو جبرني فطوعه
ما هو صحيح إن (الجذع) يكره (الفاس)
شف جذعي لفاسك تسابق فروعه
وشف صدري اللي من لظى حر الأنفاس
آخاف تتهشّم بقايا ضلوعه
وشف قلبي اللي يعشقك دون هالناس
ما بل بك ريقه.. ولا سدّ جوعه
يهواك واحساس الغلا ما له قياس
متميز(ن) فالحب - كمّه ونوعه-
تقدر تغيب وما على خافقي باس
لا يحزنه شئ(ن) ولا شئ يروعه
مخزون صبري ما وصل حد الافلاس
والقلب يملك عدّته مع دروعه
لكن أمانه لا غشى عيني نعاس
فاحلامي انتظرك ... ونفسي قنوعه