مساجلة بين فيصل الفارسي وحمود بن وهقه وفهد الأغبري

[محمد الراسبي]

مساجلة بين فيصل الفارسي وحمود بن وهقه وفهد الأغبري :

¤ فيصل:
ياحمود أنا وياك واحد من اثنين
اما ثنين خبول ولا سكارى

لكن عسى يطلع نصيب المجانين
أوفر من اللي بالهموم يتوارى

¤حمود:
ياخوي فيصل والعقل ماهو بزين
شف اليهود تعرف معنى النصارى

انته وانا جن ورسينا على طين !
ألعب بلستيشن ، تعال انتبارى ؟!


¤ فيصل:
نلعب بلاستيشن وواحد وستين
ونركض ورا الاوهام ليلا نهارا

لو ما النصيب يقول كل يوم بعدين
ما شفتنا طول الليالي سهارى


¤ ويدخل فهد ع الخط:

اللي ولد في عام واحد وتسعين
أبصم بأنه صار ضمن السكارى

"يبغى يروح العين ويبكي العين"
حتى لو عيون اﻷوادم حيارى


¤ عاد فيصل ما عجبه في صديقه بن وهقه وقال:

يا فهد وانت اللي تعرف الموازين
لا تستهين بواحدن ما يجارى

عساه لو مولود في عام ألفين
الصقر صقر(ن) والحبارى حبارى


¤فهد رجع يمدحه:

يا صاحبي..تدري أعاف القوانين
اللي بندرسها ف ليل ونهارى

حمود يتجاوز ربعنا من يمين
متمرد..وربعي بعدهم حذارى


¤ رجع فيصل يقرصه

حمود لو يركب فحول البعارين
لن يقتفي مني سوى ذا الغبارا 

لكن اذا جيت أوصفه، شاعر زوين
ينفع يغني زغرطوا يا سمارى


¤ والختام عند فهد:
لا والله إلا مبتلش فيه عامين
وجروح قلبه المرتبش ما توارى

يبغى يزاحمني على الشين والزين
ويظهر معي دايم ف "بوح السهارى"