الناس اجناس للشاعر اسعد البلوشي موجهة للشاعر القدير خديم الريسي

[بن ناصر البلوشي]

أسعد البلوشي



بو ذياب طمنا ترى الناس للنـــــــاس
والوضع في شتى الميادين مـدروس

الطيب منك وصاحبك باني الســــاس
على اليمين وما بدى منك مقيــــوس

من رافق الاجواد له قوة البــــــــاس
والشهم ما ينباع في القلب مغـروس

طولت في صدك وانا حابس انفـــــاس
واعلنت هجرانك ولا منك محســــوس

ان كان قصرنا ترى البعد مقيـــــــــاس
والا انت في خافي المعاليق مدســـوس

ناسن تموت ولا بعد هزت الــــــــــراس
وناسن يلي قفت لها تنحنــــــــــي روس

ما تستوي حيا على وكر جرنـــــــــــاس
ولا تستوي حرب(ن)بلا سيف وتــروس

واليا طروا العربان فالناس اجنــــــــاس
حنا بني مازم ومن دار قابــــــــــــــــوس



وهذا رد الشاعر خديم:

اهلا عدد ما هب م البر نســــــــــــــاس
باللي رسل خط(ن)معرب ومـــــــدروس

صحيح ان الناس في العالم اجنــــــاس
واطباع بين امرين ظاهر ومدســـــوس

ظاهر تشوفه العين وتقيسه النـــــــاس
ومدسوس لكنه مفسر ومحســــــــوس

واللي من اطباعه معاتب وحســــــاس
له في كتب الايام معجم وقامــــــــــوس

ساعة قريت الخط جريت الانفـــــــــاس
لان العتاب الحي تحيا به نفـــــــــــوس

قطع اليمين ولا قطاعة هل البـــــــــاس
اللي لهم في الخاطر الشوق مغــــروس

انا بهم وان صاحت اصوات الاجـــراس
صاحت عزايمهم بفزعة ونامــــــــــوس

ولو ما زميلي يمكن اقول جســــــــــاس
عود زمانه وعاد بالسهم والقــــــــــوس

لكن عرفت انك معاتب ولا بـــــــــــــاس
وعليك رفقة تامر ونخضع الــــــــروس

بالخص انك تعرف الناس للنــــــــــــاس
ومن اصل هل مازم ومن دار قابــــوس