( صكي الشبابيك )

[عبدالله المزروعي]

المشاركة الأصلية كتبت بواسطة علي الغنبوصي

كسرا لحاجز الغياب


( صكي الشبابيك )

صكي الشبابيك بألواح الجفا واهجري
ما عاد عصفور حبك فوق يدك ينوح

من غابت الشمس عم الصمت ليل اسهري
ذوقي العنا والشقا بأحضان قفر السيوح

هذا انا من لبست الحب قلبي عري
متشقق شعور شابع جور كفي جروح

كان العشم فيك أغلى من كنوز الثري
ايلين شفتك تخونين العشم والوضوح

طحتي من العين ياللي ساكنه محجري
من طيحة المعتلي من فوق جرف و سفوح

سحب الوصل عام ما هلت وانا محتري
عادك تبيها تهل اليوم لا يا شحوح

لو البساتين تحيى بكوكب المشتري
فاح العطر بس عطرك منخمد ما يفوح

تدري متى ينفضح همك متى ينقري
لا صرت وسط البشر ساكت و دمعك يبوح

و تدري متى تسجنك الاشواق وانته بري
لا حاصرك زول خلك وين ودك تروح

صكي الشبابيك دام الجرح لا ما بري
آخاف من شوفتك ارضخ بليا شروح

ـــــــــــــــــــــــــــــــــــــــــــــــــــــــــــــــ
وين رايح يا علي؟
سلام الله عليك وش هالابداع شو هالتألق
صراحةً اتحفتنا بقصيده وافيه

كنت اسجل اعجابي بالقصيده من بدايتها من البيت الاول وتفاجأت في نهاية القصيده اني سجّلت جميع الابيات ...للامانه اعجز عن وصف هذا الكم من الشعر
ــــــــــــــــــــــــــــــــــــــــــــــــــــــــ
علي انته شاعر ع القميم النايفات
ـــــــــــــــــــــــــــــــــــــــــــــــــــــــ
لك كل الود والتقدير