بُرْكَــــانْ كِبـــرْ

[رضوان الهاشمي]

السلام عليكم ورحمة الله..،،

تحية لقلوبكم الطاهره وللسلطنة الادبية والشعرية

كان للغياب استراحه وعسى ان تكون هذه البسيطه كاسره للغياب...وان نتواصل جميعا
لما فيه المصلحه العامه والخير .





بُرْكَــــانْ كِبـــرْ



تخيلت الشعر بركان هّيج بالغضب فوره
اذا شب الجمر من موقده تصعد دخاخينه

ويربك رجفة انسانن وقف ماشاف مقدوره
انا كل الانــا يتلبســه ساســـه الى حينــه

يشب الجمْر في وقته مـ هزه وقفة غروره
يناطح رعب دخانه سما عن كبْر واطينه

تقول الارض ياكيده صغير الامس في جوره
كبر ماخالطه طيني وهذا الكبْر من طينه

يفوح الجمر من يغلي وثور فالارض ثوره
وانا ثارت عزوم الشعْر فيني مع شياطينه

ركدت ادري ولكن ما غفت عيني عن سطوره
تناظر لين ما شبّت وحطت عيني بـ عينه

نخيت العزوه اللي من سليل السيف ماموره
توطي للكبر خشمه وتخلع لــه جناحينه

واذا قالوا شعر داوي ، يفزْ للشعْر دكتوره
يسيل ولا بعد ياقف مدامه وافين دينـــه

ألوح للكبر بدري ،وبدري ماخفت نوره
مدامه فالسماء عالي طريقي اليوم مضوينه

فتيل الضوّء لو زادت به الطاقه على شوره
تفجّر والسببْ شوره ونوره صار مطفينه

تسيّد هالكبر ناسه وبان الذبْل بزهوره
تشوف الظاهر اشْ زينه ،رمى شاشه على شينه

يحسب انّ الخبثْ كاتم لا دارت لفة الدوره
تفوح الرايحه بخبثه وتنزع ثوب مخفينه

ألا وش فايدة ثوبن لبسته وما ستر عوره؟
تجرّه اسنين وتكابر ولاجادت به اسنينه

تعرّى والسبب عينه،بصرها قاصر الصوره
يظن انْها سناده يوم ،ضاعت به عناوينه

وقفت وقلت يا سامع يمرّ الوقت ودهوره
شواهد هالكبر تربه وطت رجلك ميادينه

غرق فرعون فرعونه وكبْرك لاحق بحوره
تمسّك والحبل رايق مدام انّك موازينه

وحبلن راخي بنحرك يجي يومن على دوره
يشدك والحبل حامي يسوقك لي براكينه














28\11\2009م

رضوان الهاشمي