طـــــــــمـــــــــــــوح ... عفوية

[إبراهيم بني عرابة]

عفوية...


" طــــمـــوح "

ما عدت ابي أدرس ولا عندي طموح
ما دامك انتي بسّ انا لجلك درست

من عاد اشوف النور في وجهه الصبوح
وانتي الحصاد اللي لجل شوفه غرست

وان كنتي انتي بنظرتي فتح الفتوح
من يوم رحتي عفتها الحرب ومكست..

.. كنت احظر ومعذور هدّيت الصروح
أصحى على نزفي و على جرحي رمست

زدت ف غيابي والسبب بــ انّ الشروح
تربطني بنصحك ليا باسمك همست

ياما نصحتيني أدرايها بجموح
واليوم يأسي يسبق يديني ان غمست

غرقان والوحدة علت بين السفوح
تسبق شمس صبحي ليا بعزمي انترست

كلما دخلت الروم يجبرني أبوح
حبّك وسط قلبي لذا ضقت وعبست

قالوا معقّد والغبا بشكله يلوح
لكن تجاهلت و على جرحي جلست

قبّلت خاتم ذكرياتك والجروح
ضمّيتها فدوة و دمع عيني حبست

أفتح مذكرة الدروس وثم أروح
أرسم حروف اسمك ولو هو وقت تست

واسرح أفكّر فيك واشواقي تفوح
و آشمّ عطرك كلّما حروفك لمست

يــ استاذ تشرح بسّ انا قلبي ينوح
يعني طبيعي يوم تسألني اعتفست

شرحك وصلني وما يبي زيادة وضوح
ما اقول بالخاطر من اسلوبك نعست

وان كنت تعذر ضيقتي و قلبك سموح
لــــ تلومني لا شفتني اليوم انتكست

دنياي ضاقت والفضا ما به نزوح
وانا لجل موتي تجهزت ولبست

الحزن طاغي والوضع ما به رجوح
من يوم مالت كفة افراحي كدست..

.. فيني المواجع والوجه طلق ومزوح
شفني ابتسمت وعذرك بضحكة التمست

لو ما بقت ي استاذ وسط الروح روح
من عاد يجبرني ليا طحت و يأست .. !

من هو لجل عينه يظل فيني طموح !!
وانا فقدت اللي لجل عينه درست !!!

...