رسمتك لوحه بعالم

[أنا الدرة]

"

رسمتك لوحه بعالم ملامح صورته وجهين "
على درب المحبه جيت أسطّر للوفا حرفين
وفدا عمري لهالحرفين وكل أيامي وسنيني
حروفا ً سطّرتها عصور ، مو من يوم ولا يومين
حروفا ً تاخذ الأعمار هديّــه براحـــة يديني
أمـــي ياغلا عمري يا نورا ً لهذي العين
يا شمعــه وسط دربـي تنوّرني وتضــوينــي
رسمتك لوحه بعالم ملامح صورته وجهين
وجه الجنّـه يا يمه و وجهك يا أمـــل ديـــني
انتي النبض في قلبي وانتي اللي نظير العين
وانتــي دم يــــا يمــــه يسري في شرايـــينـي
حملتيني وتحملتي سلوكي بالحلو والشين
تجاهلتي عـن الزلّـــه وتفاخرتي بكــل زينـي
حصدتي زرعك بقلبي وهاك القلب لك ألحين
فداك القلب يــا أمـي ألا يــا فخر فــــ جبينــي
جمعتيلي فرح عمرك وقلتي للحزن أهلين
تهلــــّي بالحزن دايـــم ولا ترضي يبكّـــــيني
قهرتي موج عبراتي وحضنتي قلبي المسكين
وربّيتي صغر سنّـــــي وليالي الصغر تبكينــي
يايمه قولي وش أهدي أمانه قولي بس تكفين
تبـــي عمــري؟ اهو فدوه ولك روحي تخلّيني
ألا يا شجرةً ظلّت تظللنا بظــلال الدين
ألا يـــا مدرســه دايـــم تهــذبنــــي وتربينــــي
أمــــي يا أمل بكره ويا أمسي وكل لسنين
أمـــــي يا حضن دافـي ويا أجمــل عناوينـــي
أمــــي يا بيت القصيد أنتي يا كل الحنين
أمــــي يا رمز المشاعر يـ أعظم بيت يحميني
تنصت الدنيا أمامك لو بكلمه تنطقين
وينحنــــي راسي يا يمـــه إذا إنك تحـــاكيــني
يا يمه ربي يصونك وعسى دايم لنا تبقين
يـــ أطهر قلب حبّيتـه وأطهر مــن يواسينـــي