للريح ما لعثم نداه

[حمود الحجري]

للريح ما لعثم نداه

إلى صديقي الشاعر : حمد هدوب

لا تزرعين الشــوك بينك وبينه
وإلغي الموانع ،كلـّها ،والمسافة
تأثثي بالعطر .. تفــداك عينه
وتريثي ، واسقي ضماه وجفافه
واحني عليه بوارفك .. تسبغينه
يا بنت ، بظلال الرضا واللطافة
ياااااما تشرّد في ضَيـــاع المدينة
يااااما تسكّع في المقاهي حَسافة
يااااااما سفح حلمه وجرّة حنينه
في كل شارع وأشعل الليل قافه
عــن كنزه المفقود تنهااال وينه
وتبلّل الحسـرة صَحـــاري كَفافه
ما جــادت الغيمة بموعــود طينه
للرييييييييح مـا لعْثـم نداه ، وهتافه
صْياحه ، شيْطنته ، وذكرى دفينة ..
بالـوهْـم لـوّنـها ، سـقـاهـا شغـافـه
بَـوَْصـلتـه الـمتـردّدة في يـديـنـه
والغبْش ، وحْصار الضباب ، ونفافه
يتوه في سحْر العيون ، وتدينه ..
لحظات طيشه ، والعبَث ، وانحرافه
يفتح ، ولا يلقى له فـْ راحتينه ..
غير الهبا .. ويضمّهن ، بإرْتجـَـافة
زمان له سايح ، يدوّر سكينة
زمان له هايم ، وطوّل طوافه
ولا درى ان الوعْد / ضحْكة سنينه ..
بيت ٍهناك بْحارته وْظل غافه
قلبٍ وسَع كَثـــرة عَنــــاه وأنينه
يرفأ جُـروووح ٍ غرّزتها المسافة