خذلتينـــــــي

[محمد مبارك البريكي]

يقولون الدلع طبعك وإنك آخر العنقـــــــــود
واصدق ما حكو لأنك بأطباعك خذلتينـــــــي

صحيح ان السماء تمطر لكن المطر برعود
ولو ينسى حضن غيمة أبد ما تبكي لك عيني

أنادي بليل سماري وصبر قلبي الموعــــود
عساها تقترب شمسي وقل يا شمس ضمينـي

أنا المسجون باوجاعي وما به سجن دون قيود
وإنتي محكمة عمري خسارة ما نصفتينـــي

طلبتي مني أسبابي ولا أدري وش هو المقصود
إذا كان العذر قصدك أبي منك تخلينـــــــــي

دفنتي داخلي ظلمك وصرت بلا وطن مفقود
غريب بين جلاسي يتيم من يواسينــــــــــي

أحبك كذبة قلتيها خيال بداخلي موجود
حقيقة ما عرفتيها ولا حتى فهمتينـــــــــــي

تحسبيني جسم ميت على أطراف اللحد ممدود
لأنتي حاملة كفني ولا جيتي تعزينــــــــــي

أبصبر وكم لك أصبر إذا كان العمر محدود
وإنتي مثل ما إنتي على كيفك تمشينــــــــي

أكذب فيك حسادي محال أكون بك محسود
حتى لو كذب قالوا أنا ما أقول عذرينــــــي

تركتك تعرفي طبعك ودعوت الخالق المعبود
ينسيني عنا شلته ويغفر زلة سنينــــــــــــي

قبل لا عرفك نفسي عرفتك آخر العنقود
وعرفت ان الدلع طبعك وانك بس خذلتيني