سـمانـا يـا الـبعـيدة يـا الـبعـيدة مـا لـنا جـنحان

نـموت أحـرار دام ان الـنجـاة آخـر أمـانـينا

رمـينـا الـملـح في كل المدن ما نحسب البلدان

نـسافـر مـا طـعمـنا سـكر الـفرقى خـطاوينا

تـعبـنا كثير ما نكتب عن الفرقى على الجدران

حـبيـبي: ما لها الجدران! ما تسمع مآسينا

كـتبـنا: يـا الـعمـر شـابـت ليالينا أسى وحرمان

ولا قـــدر لــنا قــبلة لــقانــا فــي لــيالــينــا

تــوادعــنا كــثيــر ولا عــرفـنا ضـحكة الـبيـبان

ولا فــي بــالــنا أول هــوانــا لــو يــخطـينـا

أيــاديـنا نـبت فـيهـا الـحنـين وحـظهـا الـفنـجان

نـقلـب حـلمـنا..خـطوط الأمـانـي فـي أيادينا

نـلون فـي أمـانـينـا مـن أحـجار الـسهـر ألـوان

ونـكبـر..لـو تـموت أحلامـنا..تـبقى أسامينا

كـبرنـا الـيوم مـا نـرمـي مـآسينا على الأوطان

بــتبــقى أوطـانـنا مـهمـا تـغربـنا ..مـنافـينـا

كـريـمٍ يـا الـنهـر مـجراك لو يسقي فم الخلجان

لــنا الأقــدار يـمٍ ويـن مـا حـطت مـراسـينـا

سقى الله من لها بين المحاني مورد العطشان

عـلى سـدرة صـباهـا كـم نـنوح وكم تأسينا

عـزانـا الأرض نـزرع فـي حنايا ترابها إنسان

قــريـبة..لـو رحـلنـا..أرضـنا بـاكـر تـناديـنا

بـعيـدة يـا الـسمـا ..واللي مثلنا ما لهم جنحان

نموت أحرار لو شاب العمر ..تبقى أمانينا