ياأصحاب الهيام

[السعدية]

المشاركة الأصلية كتبت بواسطة محمود النبهاني

على شاطي الأماني نسير بلا وقفة ولا رجعة
نقاوم رمله المبلول نحاذر زلة الخطوات

وبحره يصفع بموجه بصفعة تعقب الصفعة
وحنا في أملنا نعيش نِحَسْب ان الأمل مافات

حسافة ضاعن أيامٍ عرفنا الذل والدمعة
وضيعنا أمانينا مع الخذلان والدمعات

وشابن روسنا واحنا نقاسي الصمت والفزعة
وأثاري كلها أحلام حقيقتها ألم وآهات

عرفنا الدنيا بس مظهر تبين بزينة الطلعة
تخبي في صحايفها معاني الغدر والعلات

وكم من قول يأسرنا واثاري القول بس خدعة
تبعنا من يبايعنا كلامٍ يشبع الرغبات

وجينا الحب وغامرنا ونحسب كل ذا متعة
مندري عن بني ادم لهم في حبهم نزوات

بنينا للأماني بيوت فرشنا أرضها السنعة
وجملنا زواياها بأحلام الأمل والذات

رفعنا بالمنى أنوار وضاءت للهنا لمعة
وقلنا هذا مطلبنا ومأمل طالب الجنات

بعدها صارت الجدران بغمضة عين منصدعة
وخر السقف بالأحقاد وصوت الآه والونات

عتمنا في الظلام ولا لقينا النور والشمعة
تعثرنا ولاندري نكمل او نكون أموات

قرينا في العشق دستور وجمعنا الهوى وشرعه
وشفنا من ضحايا الحب قصص وافلام وحكايات

يـ زين الوقت لو يمضي علينا بلحظة وسرعة
نشوف سنين وايامٍ وكله في العنا ساعات

تضيقنا ولا شفنا بهالدنيا لنا وسعة
ولا خذنا من الحالي ولا الأشواق واللذات

وبن آدم بنياته ميلقى للهنا شبعة
ويزرق ربنا الإنسان على الأعمال والنيات

ومن يرحل عن الدنيا ويبقى الطاري والسمعة
وكل اللي بقى تذكار وموقف ينتسي بلحظات

يـ أصحاب الهيام اصحوا قبل ماتحمي الوجعة
ترا الأعمى عن الدنيا يواجه شوك ومطبات

وحب الخل لو يسكن بقلب المبتلي وضلعه
ولا من عقل به حاضر يعاني السقم والعاهات

جنون الحب لو يشفي فراغ القلب أو جزعه
لكان الكل عشاقٍ من النظرات والغمزات

ولكن الحذر واجب من الحيات واللسعة
ترا اللي مايجيد العوم بيغرق لو صمد فترات

وكل إنسان يحصدله من اللي ينبت بزرعه
ومن يسعى لحب الخير يلاقي الحب والراحات

وكل حاذق بحرف القول يميز ذله و نفعه
ولايجري ورا الأهواء ولا الأطماع والزينات

ويعرف منهو محبوبه ويعرف عونه وربعه
ويعرف وقت مايحسن بظن الناس والغايات

ويمشي في دروب الحب بلا زلة ولا وقعة
ويخلص في رضى المحبوب يحبه حب ظل وبات

وختم القول ياسامع صلاة الله بكل جمعة
على المختار والأصحاب وآل الطهر والطاعات

تسلم يا اخي على هذا الكلاام الاكثر من رائع...
نور الله قلبك..
تقبل مروري..