من نصوص الملتقى (الشعر الشعبي)

[أحمد الهديفي]

تميمة

* القصيدة الفائزة بالمركز الثالث

وحيد إلا من الظلما ووجهي وأثمد النسيان
معي طعم الثواني في غيابك / فارع أحزاني
ترتل عيني أسفار الرجوع لأخرس البيبان
طلع شوك السهر في محجري واصفّرت أجفاني
وسط ليلٍ ذبل.. عبرة تغافل قبضة السجان
وتنزل كنها صوت الحبيبة داخل آذاني
وأشهق .. ألقى صلصالي يتمتم .. يشتم الجدران
ويشتمني وأنا المسكون ..هز أكتاف حرماني
نطرتك من هنا لآخر قصيدة ، وانكتب خذلان
وفيني ينسدل شال الظلام ويخنق ألواني
رخصت الشمع في عز السواد وطعنة الحرمان
هديت النوم لعيون السهاد وقلت : ما جاني
عجنت بطينتك ماي الضواحي وأزهر الرمّان
حنيت لهامتك كل الظروف اللي تحدّاني
وسال الحزن غصبٍ عن عيوني .. وانكسر انسان
عجز يفهم لهاث الخنجر وسادية الجاني
عجز يستر بأصابيعه وفاه .. وعاش به عريان
عجز لا يموت .. ما يدري من اللي يكره الثاني ؟!
عجزت أقبل يكون الوهم لأحلام العمر قضبان
لذا أشعلت في يابس حطب ذكراك عيداني
تعلّق واهي أعذارك على شماعة الحيّان ؟
ولا تورق غصونك بالغلا مرة على شاني !!
سحابك مر .. لا أرض استفاقت .. لا نفافه بان
وراك يبلل عيوني جفافك .. وأنت خلجاني ؟
أبرحل والمدى وجهي / تميمة دربي النسيان
طليق وقبضتي للريح .. تسرقني من أحزاني

حمد بن خلفان البدواوي