هرمون الأمل

[سعيد المشرفي]

السلام على الجميع.. أقدم لكم مشاركتي الجديدة سائلآ المولى أن تنال إعجابكم..
وأن لا تشعروا بالملل لطولها..

نويت أحكيلك القصة.. حبيبي لو بها إحراج
تعال ولا تجي!! إلا بقلبي اللي معك شلته..
تعال وناظر عيوني حزينة والدموع أفواج
وربك من رحلت وشوف كيف الدمع سيلته..
ترى بحر الدموع اللي سبب فرقاك مني هاج
تلاطم جزره ومده - غضب - والريح مزعلته..
كأن الدمع لعيوني غدا يا هاجري منهاج
وجيش الحزن فغيابك هزمني يوم نازلته ..
أشب الشوق فضلوعي وجمره لاظي(ن) وهاج
أشبه والحطب صدري بتالي الليل أشعلته..
صغير السن وطعوني لها ما قد عرفت علاج
لك الله من لقيت الحزن صافحني وقبلته..
أنا منسى كلامك لي بجانب كاسر الأمواج
فليله بدرها وجهك بعيني كم تخيلته ..
شعوري فيك شبهته -تصور- بانكسار الحاج
إذا مد الكفوف لخالقه يرجيه مسألته..
وأنا مديت لك كفي وجيتك للعطا محتاج
فلا قربت لي وصلك.. ولا صدك تحملته..
بعيد(ن) غربتي عنك مداها والسيوح فجاج
ولا يذبل غرامي لك.. يدين الله كافلته..
وشمس الحب ما غابت لها باقصى الضمير سراج
حشا !! ما خان بك قلب(ن) على طاريك عللته..
عليم الله فغيابك تحصن خافقي بسياج
لأنك دايم فقلبي أنا غيرك تجاهلته ..
طيوفك تسرح بفكري لها مسرى به ومعراج
وقلبي يحلم بشوفك .. ترى العذال مشكلته..
وحلمي بك مثل حلم السجين بلحظة الإفراج
يطول الوقت بحسابه.. عظامه ليت ناقلته..
غرامك في وسط صدري وسام وفوق راسي تاج
أبد لا يشغلك حزني.. تناسى كل ما قلته..
لأني فداخلي أشعر لهرمون الأمل إنتاج
تحديت البشر لجلك عسير الدرب ذللته..
ولأني كلما شفت النجوم وصفحة الأبراج
دريت إن الوعد باكر وقلبي فيك أملته..
بنحيا والعمر جنة نعيش ونلبس الديباج
توسل واطلب المعطي وأنا قبلك توسلته..