ليش السكوت!!!

[سعود الصقري]

ليش السكوت!
هي الأماني بس تموت؟!
حنا بعد ..
باكر يجي يوم ونموت!
باكر نغادر ذا الوطن
و نبعد بعيد ..
ويبقى المكان
نفس المكان
***
ليش السكوت!!
ودي تعرفي نقطتين!!
الأوله إني بشر
والثانيه قلبي غدا مثل الحجر
وإنت السبب..
***
تتذكري تلك الوعود
وأحلا الأماني والعهود
كنا صغار..تونا شعرنا بالجمال
و كانت حكاوينا تطول
و تمر علينا كم فصول
وحنا نغازل حلمنا
ما همنا حر و شتا
كل الفصول تبقى ربيع
رغم الصقيع
كانت أمانينا سلام
***
ليش السكوت..!!
حنا كبرنا عن زمان
مر الزمان..
وأنا على نفس المكان..
بس القلوب تغيرت
حتى الحروف تكدرت
وتناثرت بين السطور
بلا شعور..
و إنتِ إختفيتي بلا سبب
والله عجب!
ما كنتي تلتفتي وراك..
وأنا أتوسل ترجعين!!
رغم الأنين
ما تسمعين..
أقسمتلك إني أبيك ..
وإني على رمشي أجيك
و نكمل القصة سوى
***
وتمضي السنين!
وأنا يرافقني الحنين
وإنت تغربتي هناك
بين المدائن القصور..
و المال أهداك الغرور
بلا شعور ..
واليوم جيتي نادمه!!؟
يا آآآثمة!!
ظنك أعود ..!!
لا ما أعود .. هي الأماني بس تموت؟!
حنا بعد ..
باكر يجي يوم ونموت!
ليش السكوت ..!!!!!!