كلنا الليله يتامى ، والأسى عــــــــــــــــم الجميع
مابقى فـ الناس واحد ، مابكـــى "سعود" الحنون
الفقارى والأرامل ، حتـــــــى هـ الطفل الرضيع
كلنا الليله بكينا ، والألــــــــــــــــــــم هز العيون
وش يهوّن هـ المصيبه ، والمُصاب أصلا ً فظيع
كل صدمه غير موتك ، يـــــــــا أبو محمد تهون
كيف نصبر والمنايا ، بعثرت حلــــــــــــم الربيع
لين كل الورد أصبح ، ذابل(ن) فــــوق الغصون
كان جودك مثل غيمه ، تروي الكـــــــون الوسيع
كان قلبك من حنانه ، يحتوينا فــــــــــــــي سكون
كنت تعطي ماتفـــــــــــــرّق ، لا رفيع ولا وضيع
من عطاك الكل يشكر ، والخلايـــــــــــق يشهدون
من وصل بابك ونادى ، يلقـــــــــى ردك له سريع
أبشر..إطلب ، واللي ودك فـ العجل ، حــالا ً يكون
كم نفعت ، كم رفعت ، ورممت بيـــــت(ن) صديع
وكم مريض(ن) بك تعافى ، مـــــن معاناة وطعون
وكم فقير(ن) جاك يشكي ، من أسى دين(ن) مُريع
لين روّح من حنانك ، خالي مــــــــــــن هم الديون
كم..وكم..وكم..وكم ، خوفــــــــــــي تعدادي يضيع
ويش أعدد؟!..كيف بحصي فيض خيرات المزون؟!
إنت قدرك يبقى دايم فــــــــــــــــــي خوافقنا رفيع
إنت فيض(ن) من عواطف ، تنجلــي فيه الشجون
إنت حلم(ن) للمروه ، إرتســـــــــــــــــم واقع بديع
إنت رمز(ن) للشهامه ، إنت للمحتــــــــــــاج عون
لك يـ بو محمد وفانا ، يبقـــــــــى شاكر هـ الصنيع
ونبقى نشكر دوم جودك ، ياوفي طـــــــول السنون
إرتفع صوت الحناجر ، يدعـــــــــــي الرب السميع
يجعل الفردوس أجرك ، عَدَ ماقلبــــــــــــــك حنون
كلنا الليله يتامى ، والأسى عـــــــــــــــــــــم الجميع
من فقدنا "سعود" صاحت ، بالألم كـــــــــل العيون
