أعتذر يابنت برحل وإسمحي لي بالرحيل
هالمسا ذابت ضلوعي والمشاعر تحتضر
يادفا برد الليالي ، ونشوة الحلـــــم الجميل
طاح حلمي اللي رسمته فـي غرامك وإنكسر
هالمسا صمت الحنايا ثار يصـــرخ مستحيل
كيف ذاك الحب كلّه في ثوانــــــي يندثر؟؟!!
كيف عمري اللي رخصته للغلا وأغلى خليل
ترخص أيامه وترحل في شقـى حبك هدر؟!
مات ذاك اللي جمعنا هالمسا وأضحــى قتيل
هذا هو جثمان حبك والحنايا لـــــــــــــه قبر
جبّت لك أصغر عروقي للغلا نبــــض ودليل
يمكن إحساسك يصدّق بعّدها إنــــــــــه خسر
إيه خسر حب ٍ كبير ٍ وافي ٍ مالــــــــــه مثيل
إيه خسر قلب ٍ تمنّى مـــــــــن بساتينك زهر
أعتذر ماجيت أعاتب..للعتب مافينــــــي حيل
بس جيت أهديك دمع ٍ من هدب عيني إنحدر
أدري إن الدمع يفضح صاحب القلب الأصيل
والمصيبه إن قلبي ماله عالفرقــــــــــى صبر
دمعة الفرقى مريره صدّقي لمّـــــــــــــا تسيل
ودمعتي تجرح عيوني..بس يامقســــى القدر
من عرفني يعّرف إني صاحب البـال الطويل
ويعّرف إني طول عمري شايل همــوم وكدر
ماهقيت إن المشاعر ترتجـــــي جود البخيل
لين شفت القلب يطلب من سحب حبك مطر
قلب عالعزه تربّى عمره مايصبــــــــح ذليل
والمذله صدّقيني مالها بقلبــــــــــــــــــي مقر
ماهي من عادة خفوقي يطلب إحسان وجميل
ولا أنا منهو يدوّر للعطـــــــــــــا وقت وعذر
يوم أنا أعطيت عمري بالوفـــــــــا شفته قليل
كيف عـــــــاد اللي تمنّع بالغلا يعطي شهر!!
المحبه لو تلامس عالـــــــــــــي النخله تميل
كيف قلبك هالمحبه خلّت إحساسه حجر!!
البحر من فيض حبي صــــار مثل السلسبيل
والغريبه كان حبك مالـــــــــــح ٍ مثل البحر
لا تظني الغدر ممكن للوفـــــــــا يصبح بديل
ماهو قلبي اللـــــــي يبدّل هالغلا زيف وغدر
ضاع عقلك صدّقيني بين قــــــــــال وبين قيل
وغرّتك دنيا الأمانـــــــي والهدايـــــا والشعر
صار قلبك من غروره مــــــع سخافاتك يميل
لين صارت في عيونك قيمتك تسوى عشر!!
الغرور اللي تملّك نشـــــــــوة إحساسك دخيل
كان قلبك مثـــــــــــل طفل ٍ في عباراته طهر
الدهر لاشك إنه ياشقى قلبـــــــــــــــــي كفيل
يفتح عيونك علــــــــــــى اللي فيك سوّاه الدهر
هذي هي أسباب بعدي والتجافــــي والرحيل
إكتشفت إن المشاعر فــــــــــي غرامك تحتضر
أعترف إنك بعمري كنتي لــــــي حلم ٍ جميل
بس حلمي فـــــــي غرامك هالمسا شوفي إنكسر
