يا آنسه
تدرين إنـــــــي لافقدتك وش يصير؟!
أموت في هيئة طفـــل قد مات جوع
المشكله حبك غـــــدى لقلبي مصير
غصب أعشقك ماهو ترى رغبه وطوع
شفتي الأسير؟! حالي أنا مثل الأسير
اللي إحترق في غربته مثل الشموع
ماله أمل ويش العمـــــل دامه كسير
وإليا بكى يبكي بلا صـــــــوت ودموع
وضعي ترى فـــي غيبتك جدا ً خطير
والشوق يلعــــــب لعبته بين الضلوع
لو ماني بك يا آنسه شخص(ن) جدير
الأفضل إنّا نفترق ، كافــــــي خضوع
الموت حق والعبره دايـــــــم فـ الأخير
وأكبر عيوبي إن لــــي قلب(ن) قنوع
ولو كنت أطلب فـ الهوى شي(ن) كثير
كنتي عرفتــــــــــي للغلا ألفين نوع!!
ماني ترى فـ الحب جاهــــل أو صغير
يمكن أنا فـ الحــــــب أفقه هـ الجموع
ماراح أقول إن الكبير يبقــــــــــى كبير
لكن بقول إنــــي رجل يخشى الوقوع
يا آنسه وايد قلـــــــــــــــوب بلا ضمير
وإبليس له بين البشر وايــــــــــد فروع
حد يدّعــــــــي الإخلاص والأهداف غير
وحد يتبع الشيطان فـــــــي كل الربوع
أمّا أنا ما أتبع الـــــــــــــــــدرب المرير
اللي أبد لاسرت به مــــــــــالك رجوع
يا بالحلال يضمّنا بيــــــــــــــت وحصير
يا تتركيني فـــــــــي صلاتي والخشوع
صحيح وضعي فـ غيبتك جــــــدا ً خطير
وصحيح إنك تسكنـــــــــي بين الضلوع
وصحيح إني فـــــــي شغف حبك أسير
لكن أنا لي خافق(ن) دايــــــــم جزوع
مؤمن وياللــــــــــي مايصح لا مايصير
وأهون علي من الخطا ، المـــوت جوع
