أنا لامن ذكرت إسمك ، يذوّبني الوله شمعه
ويذبل فـ المدى دربي ، وتكرهني مسافاتي
فديتك..ماعدا هجرك ، وش اللي يجبر الدمعه
جفاك اللي علي يفرض ، أبالغ فـــي معاناتي
عرفتيني وفي يرفض ، يبدّل بالجفــــــا طبعه
أموت ولا يموت الصدق والإخلاص فـــي ذاتي
أنا متوسد أحلامي ، وباني فـ الهـــــوى قلعه
حواليها بساتين الغلا تزهر مــــــــــــن أبياتي
تخيلتك أميرتها ، وقلـــــت: ((الله))..وبسرعه
غفت عيني على حلم(ن) تحقق في خيالاتي
يمر موقف على بالي ، حدث في ليلة الجمعه
وصرت أسترجعه دايم ، فــي روحاتي وجيّاتي
خطفتي لابسه صوري ، وثوب مزركش و"جبعه"
وجيتي بالدلع تمشي ، وطــــارت فيك نظراتي
تبسّمتي ، وكن الليل ، قطف مـن فتنتك قطعه
وصار الليل بك أحلى ، وصرت أهديك بسماتي
تبادلنا الحكي نظـــــــــرات ، والأعماق متولعه
وعينك بالخجل ترجف ، وعيني تقول:(لاتحاتي)
مدام الحب يجمعنا ويجمعنا دفـــــــــــا شرعه
أبد لاينجرح قلبك ، ولايرتــــــــــــــــاب..مولاتي
ترى شاعر غلاك إنسان ، كريم وطيّب السمعه
وش العيب إن غدى حبك وقربك أسمى رغباتي!!
حلا بك ثوبك الصوري ، وربـــــي يـ الغلا "وجعه"
أصيح الآه مـــــــن حسنك ، وتستحلين آهاتي
جمالك في دلالك والدلع بــــــــــك متعه وروعه
لذيذه لذّة السكر ، إلى مــــــن ذاب فـ شفاتي
ذهب يلبس ذهب..وشلون؟! ترى والله مو بدعه
أشوف "البنجري" فيدك ، يترجم حـــال لهفاتي
وهـ "المرتشحه" في نحرك ، خذت من وجنتك لمعه
وهـ "المرّيه" تزهى بك وتزهـــــــى بك حكاياتي
ونقش الحنا في إيديك ، يزيــــــد السالفه متعه
تجمّع فيك كل الزين وزينك صـــــــــــــار راحاتي
سحرتيني يـ صوريه ، وقلبـــــــــي إنقلب وضعه
على هونك ، أنا فـ الحب ، تراني فـــي بداياتي
حرام الصد يابنت الكــــــــــــــــرام وخابرك سنعه
حريصه ، ماتحبين الغلط واللـــــــــــــي معه ياتي
فديتك..ماعدا هجرك ، ولاشـــــــي يجبر الدمعه
أنا لامن تجافيني ، أقاسي فــــــــــــي معاناتي
مدام إسمك إذا مرني ، يذوّبني الولــــه شمعه
ويذبل فـ المدى دربي ، وتكرهنـــــــي مسافاتي
