يفيض البوح من نبع الغلا أبيـــــــــــات موزونـه
وتنبت في ضفاف الشعر لك يا فاتنه أزهار
وتقبل هـ القوافي لك مشاعر شـــــــــوق مجنونه
أنا شاعر وكل عمري نزفته في هواك أشعار
سلام الشوق يا "ساره" وقلبك عــــــاد وشلونه؟
عسى باقي على عهدي ، وشايل للهوى تذكار
أحبك والغلا يصعب علينا نعيش مــــــــن دونه
ولكن هو كذا حظي ، وهذي حكمة الأقدار
تفارقنا وكل(ن) راح فــــــــــــي دنياه وشؤونه
ذبل حلم القلوب اللي بكت في آخر المشوار
أنا ماجيتلك لايم ، ولو هـ الــــــــروح مطعونه
أنا جيت أرتوي من رقتك وأرحل شخص منهار
عسى يرتاح تفكيرك مــــــن الهوجاس وظنونه
وعسى ألقى سبب واحد يبرّد حرّة المحتار
هذاك اللي يبان الحب والحرمــــــــان فـ عيونه
وقف مذهول في صمته ، يدوّر للفراق أعذار
نعم يا "ساره" إحساسك ، خفوقي لازم إيصونه
أموت العاشق الوافي ، ولا أحيا الغبي الغدّار
أبرحل والألم يذبح أحاسيسي علـــــــــى هونه
إلى وين السفر ياللي مفارق في جفاها دار؟!
وش الديره سوى محبوب يحطّك داخل جفونه
و"ساره" هي وطن قلبي وغيبتها عذاب ونار
يعين الله من فارق حبيب وفاضـــــت شجونه
على شاطي الألم يجلس ، يبعثر أطهر الأسرار
إلى "ساره" رحل قلبي وخلّـــــى ناسه وكونه
رسم رقة ملامحهـــــا ، على كف الغلا أقمار
هذيك اللي تهادت في خيالـــــــي بنت مزيونه
تجي وتروح في بالي وصارت تملك الأفكار
من الرقه أدلّعها إذا ناديـــــــــــــــت "زيتونه"
دلوعيّه كـــــــــــذا خلقه ، نقيّه تشبه الأمطار
ولو تطلق شفايفها أسر بسمـــــــــات مسجونه
من الروعه ، عسى يستر علينا ربي الستّار
يذوب الورد في لحظه ، ويتبرّا مـــن غصونه
وتصبح كل صحرا فــــي ثواني غابه وأشجار
خذت من ريحة النرجس ومن وجه القمر لونه
ولامنها مشت تسحر قـــــلوب وتسلب الأنظار
وتتبعها مثل طفل(ن) يلاحـــــــق خيط بالونه
ولايقدر يلامسها..كــــذا "ساره"..حسن جبّار
كثير قلوب في صفوة حلاهـــــــا حيل مفتونه
ولكن ماقدر يوصل موانيهــــــــا سوى البحّار
هذاك اللي يبان الحب والحرمــــان فـ عيونه
وقف مذهول في صمته ، يدوّر للفراق أعذار
تفارقنا وكل(ن) راح فـــــــــي دنياه وشؤونه
ذبل حلم القلوب ، اللي بكت في آخر المشوار
