إذا ناوي علـــــــى هجري ، نصيحه لاتسويها
أنا من أركب عنــــــــــــــادي ، أخرّبها..أخربها
بزلزلها على راســــــك وأجيب أعلاها واطيها
وأخلي دمعة عيونك أسيره فــــــــــي لهايبها
أنا ماني جبـــــــــــان ، وكلمة المنطق أبدّيها
وأكاذيب الحكي جـــــــــــــدام صاحبها أكذّبها
أجي واثق ولا أندم علــــــــــى حاجه أسويها
ولا ألعب أبد لعبه ، إذا مــــــــــــاكنت كاسبها
ولو هـ الدنيا تتحدى ، أنـــــــــــــا أقبل تحدّيها
بسيّرها علـــــــــى كيفي ، وألاعبها وأدعابها
نعم أقدر علـــــى كيفي ورغبـــــاتي أمشّيها
حشى ماتلوي ذراعي ، وربـــــــي راح أغلّبها
ولو زادت مصايبهـــــــــــــــــــا وغثتني بلاويها
أنا ماتقهر إحساسي بلاويهـــــــــــا ومصايبها
أبد لاتتبع ظنونك وتغرق فــــــــــــــــي أمانيها
قبل لا تركب براسك ، تعوّذ منهـــــــــا وإركبها
تعال وشوف بعيونك قبـــــــل لا الشك يعميها
وش مسوي غرامك في أحاسيس(ن) معذّبها
عطيتك بالوفا قلبي وهذي عــــــــــــــاد تاليها
تبي تبعد وتتركني ، وعشرتنــــــــــــــا تجنّبها
كثير قلوب أهدتني قبــــــــــــــل قلبك تجافيها
ولا أثّر تجافيها علــــــــــــــــى قلب(ن) مذوّبها
عيوني ماهي اللـــــــــــي تنتحب لاراح غاليها
وأوجاعي ترى صدك ، حبيبي مــــــاهو أصعبها
على كثر الجروح اللي تجـــــــي منك وأعدّيها
أبي تجلس مــع إحساسك وتذكرها وتحسبها
بعدها لــــــــــــو تبي تهجر ، عليك الله سوّيها
مدامك راكب عنادك ، أنا نــــــــــــــاوي أخرّبها
