إلى باريس
يقولوا سافرت باريس
إلى باريس
تذاكرها شهادة موت
وانا اصرخ
حناجرنا تخون الصوت
كبيرة صدمة الميعاد
خذيني طفلك المعتاد
حزمتي شنطة هْدومك
وانا المنفاي من يومك
تمنَّيتك !!
خذيتيني قصيدة حب
طويتيها معا هْدومك
اسولف للمسا عنك
واسافر
لي تذاكر حزْن
تنام بْجرحها مسقط
تنام وْفي شوارعها يموت احْساس
غريبه وين راحوا الناس ؟؟
فرنسا لو وصَل حلم السنين وْخان به ليلك
دخيلك علَّميه يْنام واهْدي له كتاب اشْعار
عشان يْقوم يقْراني ويغْسل من حزِن سيلك
رحَل في زحمة اوْجاعي وانا في لحْظة اسْتغْفار
اساورها بكت تشتاق
خلاخلها دموع ونار
جناينها مدن عشَّاق
ملابسها عطر مجنون
هنا فستانها الكحلي
وشيله لونها وردي
تمرَّ خيوطها يدي
اصابع
كم جرَت بيدينها مسباح !!
تشابكها / وتحضنها
رميت النرد في جوف السنين وما ظهر لي حظ
وجيت اقرا تعاويذ الفرح في كوخها المنسي
هنا كانت خطاويها
بتعزف لي حلم وردي
واسافر في سحاب الحلم
وارد ابْكي على نردي
شخابيط الورَق ذكرى شموع وْ بنسلٍ مكسور
حروفٍ ماضيه تبكي تخنَّجرني بحاضرها
بقايا شاعرٍ متعب يفتَّش في الظلام النــــــور
حرَق في دفتر اشْعاره لجِل يقرا خواطرها
متى باريس تسمح لك ؟
وتهدي لك تذاكر وصْل؟
متى صوتك / يغنِّي لي صباح الحب؟
متى قلبك يحنّ لْشاعرك ويْرد؟
متى الشَّباك يهْدي لي جناين ورد؟؟
يقولوا بعدك ف باريس
خذيتي كل شي إلاي !!
|
